親愛嘅校長、老師、同學、各位來賓：
大家好，今日好高興出席「滬江小學二十周年校慶」畢業典禮。雖然我唔係大家嘅校友，不過同滬江小學都有一d緣份；呢份緣份係嚟自我爸爸，點解呢？因為我爸爸係晌滬江大學畢業，而滬江大學香港同學會二十年前為左紀念母校八十周年校慶，晌香港開辦「滬江小學」。
我認為小學對於一個小朋友嘅成長係好重要，因為所有知識學問嘅基礎、待人處事嘅態度，都係晌呢個階段發展。而家你地做學生比我以前幸福好多，因為而家你地有一個好舒服嘅學習環境、校內設施又先進，亦有好愛錫大家、肩負起教育重任嘅校長同老師、又有家教會一班委員同義工協助舉辦課外活動。我睇過你地嘅課外活動介紹，有音樂、體育、學術、服務、興趣，甚至連視覺藝術都有，班別超過四十種類，咁多選擇，真係總有一樣會啱你，可以睇得出呢d係學校精心為大家安排，希望大家會好好珍惜呢d學習機會。
而家成日都會講求學不是求分數，我就話求學要求平衡，就好似學校宗旨「信、義、勤、愛」一樣，讀書要有好成績，同時要培養個人興趣，學習愛人如己、信實待人，以致德、智、體、群、美五育可以均衡發展，相信滬江小學同學一定做得到。
學校二十歲，正好代表一個青春少艾，步向燦爛人生。而一班即將畢業嘅同學，亦都會踏入求學新階段，希望同學離開學校之後，繼續堅守「信、義、勤、愛」理念，將來為社會作出貢獻，做一個有用嘅人。
最後，晌度祝願一班畢業同學將來「學業攀高峰、開創新天地」，而滬江小學晌教育道路繼續發揮全人教育精神，為社會培育英才。多謝大家。